"ZESPÓŁ POLSKI"

Ніхто не аспрэчвае  факта, што непаўторнасць твораў Шапэна ў значнай ступені вынікае з яго захаплення  народнай музыкай. Шапэн, зачараваны гучаннем народнай капэлы, калектыўнымі і адзіночнымі спевамі, моцна звязаўся з каханай роднай зямлёю, якую ўжо ніколі не забываў. Вядомы музыкавед Здзіслаў Яхімецкі казаў, што Мазуркі Шапэна – гэта “адзіная ў сваёй арыгінальнасці музычная эпапея польскага люду.” Праграма “Ля вытокаў музыкі Шапэна” прыводзіць да агульнага назоўніка народную музыку і “Мазуркі” Шапэна. У канцэрце прагучаць таксама ўнікальныя народныя песні і танцы – мазуркі, абэркі, куявякі і полькі з мазавецкіх нізінаў – творы, водгук якіх мы чуем у кампазіцыях Шапэна.  Музыканты калектыву “Zespół Polski” адшукваюць свой рэпертуар у гістарычных крыніцах і навуковай дакументацыі, а выконваюць яго выключна на аўтэнтычных даўніх народных інструментах.

Дзмітрый Уласюк – таленавіты беларускі піяніст, аспірант Беларускай дзяржаўнай акадэміі музыкі.  Актыўна ўдзельнічае ў фестывалях і канцэртах у Беларусі, Украіне, Расіі, Польшчы, Германіі, Эстоніі, Японіі, Харватыі, ЗША і Кітаі. Іграў з Нацыянальным Адэсскім Філарманічным аркестрам, з філарманічным сімфанічным аркестрам імя А. Рубінштэйна (г. Лодзь), з сімфанічным аркестрам Харватскага радыё і тэлебачання, з сімфанічным аркестрам оперы г. Спліт, з дзяржаўным акадэмічным сімфанічным аркестрам Рэспублікі Беларусь. Лаўрэат шматлікіх міжнародных конкурсаў, у тым ліку І ўзнагароды Міжнароднага конкурса піяністаў III EPTA Svetislav Stancic у Загрэбе (Харватыя, 2007).

“ЖОРЖ САНД, МАЗУРКА І ШАПЭН”
Харэаграфічна-музычная навэла ў выкананні беларускіх артыстаў

Музычны спектакль “Дзень дзевятай мазуркі” альбо “Жорж Санд, мазурка і Шапэн” – харэаграфічная навэла для дарослых, дзе шапэнаўская музыка, выкананая беларускімі музыкантамі, будзе падтрымана  харэаграфічным візуальным радам у стылі мадэрн і агучана перапіскай Шапэна з Жорж Санд, якая аднойчы сказала: “Адна вашая мазурка вартая ўсіх маіх раманаў”.
 Фартэпіянныя мазуркі прагучаць не толькі ў арыгінальнай версіі. Мы пачуем музыку Шапэна праз жаночае сапрана, праз тэмбравую насычанасць віяланчэльнага і фаготавага гучання. Скрыпка Войцэха Жыўнага падасць свой голас праз эпізоды шапэнаўскіх навэл-успамінаў. А шапэнаўскае ліставанне, дзякуючы разгорнутай  драматургіі, дасць магчымасць пазнаёміцца з невядомым Шапэнам.